Landsæfing 2015

landsaefing_2015_0011Á fjórða hundrað manns voru á landsæfingu björgunarsveita sem haldin var í Eyjafirði laugardaginn 10. október. 52 hópar frá 32 björgunarsveitum fengust við að leysa ýmis verkefni til að æfa handbrögð sem björgunarsveitafólk þarf að kunna.

Umfang æfingarinnar var gríðar mikið og voru til að mynda 60 sérfróðir umsjónarmenn verkefna sem keyrðu 72 verkefni allan daginn. 80 leikarar voru farðaðir sem „sjúklingar“ með alls konar áverka til að gera æfingarnar sem raunverulegastar. Æfingunni stjórnaði 12 manna æfingarstjórn.

Björgunarsveitahópar leystu alls kyns verkefni, til dæmis að að keyra þrautabrautir, bjarga fólki úr flugvélaflaki, hlúa að slösuðu fólki, æfa leitaraðferðir, bjarga fólki úr sjálfheldu og svo mætti lengi telja. Æfing af þessari stærðargráðu er mikið verk og mikilvægt að gefa nýliðum jafnt sem reyndu fólki tækifæri á að æfa við sem raunverulegastar aðstæður.