Hjá Björgunarsveitinni Ársæli er nýliðastarfið þjálfunarpakki sem tekur tvö ár.  Fyrra árið er uppbyggt af völdum grunnnámskeiðum, fyrirlestrum og æfingum. Kennt er eftir stöðluðu kerfi frá Slysavarnarfélaginu Landsbjörgu og eftir fyrra árið eiga allir nýliðar að hafa lokið svokölluðum „Björgunarmanni 1“.Seinna árið er frjálsara í sniðum, en þá er ætlast til að fólk ljúki „Björgunarmanni 2“. Þá ákveður fólk svolítið sjálft hvað það vill læra og með hvaða hópum það vill starfa. Ákveðnum grunnnámskeiðum þarf að ljúka en sérhæfð námskeið sem henta kannski bara einum hópi verður fólk að velja sjálft.Þegar þessum tveimur árum er lokið er tekið nýliðapróf, bæði skriflegt og verklegt, og þeir sem standast prófið eru teknir inn í sveitina og fá að fara í útköll.

 

Get ég starfað í björgunarsveit?

Flestir geta starfað í björgunarsveit, oftast er bara spurning hvort fólk hafi tíma til að vera virkt í starfinu.  Segja má að þetta sé í raun eins og hver önnur íþrótt eða áhugamál sem fólk stundar. Það verður að gefa sér tíma til að æfa rétt viðbrögð við mismunandi og oft erfiðar aðstæður.  Starf í björgunarsveit er mjög gefandi og félagsskapurinn góður. Því er um að gera að prófa og fá tækifæri til að svara spurningunni  Get ég starfað í björgunarsveit sjálf/ur.

 

Þarf ég að vera í góðu formi til að geta verið með í nýliðastarfinu?

Það er mikill kostur að hafa sæmilegt úthald þegar nýliðastarfið hefst því ákveðnum grunnnámskeiðum þarf að ljúka sem krefjast mikils af þátttakendum. Allir sem hafa eitthvað hreyft sig, t.d. stundað íþróttir, farið í ræktina eða stundað fjallgöngur og gönguferðir eiga ekki í neinum erfiðleikum.

 

Þarf ég að eiga fullt af græjum þegar ég byrja?

Ákveðinn búnaður er nauðsynlegur, s.s. góðir gönguskór og góður fatnaður, bæði innri fatnaður og svo hlífðarfatnaður.  Þetta þurfa ekki að vera nýjustu græjur frá flottustu merkjunum, hlutirnir þurfa bara að virka.

Skráning í nýliðastarf

Aðeins er tekið við nýju fólki í nýliðastarf á haustin og hefst þá starfið á kynningarfundi. Hér að neðan getur þú skráð þig á póstlista og fengið póst með áminningu þegar styttist í nýliðakynninguna.

Nafn

Netfang

Símanúmer

Hvað er sótt um